Ez û Yar

Çavbeleka min tu î
Por xeleka min tu î
Surmeleka min tu î
Lê dil bi kovan ez im

Surperiya min tû î
Dêm zeriya min tu î
Şengebiya min tu î
Jar û perişan ez im

Bejin bilindê tu î
Pir gewr û rindê tu î
Wek mûm û findê tu î
Ê dil bi sozan ez im

Şox û şepalê tu î
Qenc û delalê tu î
Herdem li balê tu î
Sermest û heyran ez im

Memik ji sêvan tu î
Şekir ji lêvan tu î
Di dil de mêvan tu î
Gorî û qurban ez im

Şeng û çelengê tu î
Awir pilingê tu î
Ebrû ji yengê tu î
Armanc û nîşan ez im

Taca delala tu î
Şewqa şemala tu î
Kara xezala tu î
Bi qîr û giryan ez im

Nazik û pîroz tu î
Me cejn û Newroz tu î
Agrî û Zagroz tu î
Ronik ji baran ez im

Rû gewr û şêrîn tu î
Stêr û Perwîn tu î
Şêrîn û hem Zîn tu î
Memê di zindan ez im

Ya dil birîn kir tu î
Ciger bi xwîn kir tu î
Dil har û dîn kir tu î
Kuştiyê çavan ez im

Cegerxwîn